ONGC Tripura Power Company Ltd. aro Meghalaya a·dokni Power department ni hydro power ba chioniko bijoli bikotani cholko namdapatna miksonge mijal salni bako Memorandum of Understanding (MoU) soi ka·grikaniko dakangaha. Ia soi ka·grikanio Power Minister AT Mondal, Power Department ni Commissioner aro Secretary Sanjay Goyal aro OTPC ni Managing Director Sanil Namboodiripad bakko ra·angaha. Unbaksana OTPC ni Chief Commercial Officer Arup Ch. Sarmah, Chief Technical Officer Shree Narayan aro Head Corporate Affairs ni Samarjeet Thakur ba MoU soi ka·grikanio dongangpaaha.
MoU ko soi ka·grikaniko bilsi gittamna somoiko done chioniko bijoliko bikotanio kam ka·anggen. ONGC Tripura Power Company Ltd. baksa bakrimanio Meghalaya a·dokna nangchongmotenggipa bijolini bilko a·dokna sokataniko chu·sokatan baksana mikkangchina nambatgipa cholko tariani aro samtangtango donggipa buring bolgrimko nirok simsakanio kam ka·angna man·gen ine Power Minister Abu Taher Mondal aganangaha.
Pump Storage Hydro Power Project, chonggipa aro dal·gipa hydroelectric power project aro floating solar project rango namdapaniko ra·bana soi ka·grikanikoba dakangaha. Gipin a·songrango renewable energy ba jakkaltaitaina man·gipa bijolini dolko jakkalaniko nike Meghalaya a·dokba apsandaken ja·rike bijoliko ra·bana miksongenga jekon soi ka·grikanichi chu·sokatna man·aha.
