West Garo Hills a·jao Jal Jeevan Mission (JJM) na chamatgipa tangka paisarangko jakkalstretani bidingo gitcham sing·sandianirangko dakchinagita saksa GHADC ni gitcham member Balachanda Sofior Rahman, Central Vigilance Committee ni Secretary na chitti sedoataha. Ia chittio dingtangmancha nirokgipa dolko tarie JJM ni scheme rangni bidingo nirok sandichinagita mol·mole seataha.
Rahman PHED ni Chief Engineer, TPIA, Guwahati ni NEDfi aro Tura ni M/s BAC INFRATECH Private Ltd. ni kosako JJM na chamatgimin tangka paisarangko jakkalstretanina aro manderangko cha·bokanina ta·raken kakket bichalona ra·bachina mol·molataha. PHE department ni on·gimin report o West Garo Hills ni biaprango JJM scheme ko a·bachengatgija tangka paisarangko bikote jakkalaha ine u·inagita man·aha.
Nekikona-ona chi sabae on·gipa scheme I’d 8394205 jean 2021-22 bilsio a·bachengate Dec 31 o matchotatna nanggipako matchotkujanina aro a·ani kamo 20% mangnasan matchotkuengani a·selo ia scheme ni gita chiko man·a nanggipa songona sokkujaenga ine Rahman chittio janapataha. Indake ong·genchimoba Jal Jeevan Mission-IMIS ba lekka panchao songantiona Functional House Tap connection (FHTC) ko sokatmanaha ine tol·e report ko on·skaaha.
PHED report ni mesokanigitade JJM scheme nigita tangka gong 6036.03 lakh oni gong 5148.71 lakh rangko bikote M/s BAC INFRATECH PRIVATE LTD. na tangkako gamanaha ine MDC sakkiko on·aha aro Cheif Engineer ni tangka ra·e name kam ka·gijaniko nike niamgita krae dakengama ine Rahman sing·doaniko dakangaha.
