December 22 tariko East Garo Hills a·jani Rongjeng Forest Reserve o buringni bolrangko cha∙ue salangenggipa gari Bolero Pick-up bolsa a·sel ong·e wa·al kamchipaona sokaha. U·iatanigitade ia gari bolrangko gate salangmiting somoio rama bijangchio truck baksa chatinggrike a·sel ong·aha jeon truck gari a·damoni bakan ma·sirikgija kate chakaha ine parakataha.
Bolero Pick-up AS-19C7892 gari ia obostao ga·ake gario sringgipa bijoli ritingrangoni wa·al chae chu·gimik kamgopaha. Manderangni chanchichipe agananigitade ia cha·ue salangenggipa bolrangko Khasi Hills-ona ra·angenga ine u·iataha. Kamgimin garini bidingo darangba sing·sangipa dongjani a·sel da·o dipet ia gariko Rongjeng pulis thanaona ra·ange doneaha aro nokgipako am·sandienga ine pulis dolrang parakataha.
