A·songni adita a·dokrango Covid sajinma man·anirang barirorobataienganina, mijal salni bako health departmentni officialrang baksa tom·aniko dake Meghalaya a·doknigita nipiltaianiko dakange da·o dipetde a·doko saksaba Covid sabisiko man·gipa dongkujaenga ine Health Minister Ampareen Lyngdoh parakataha. Ia tom·aniko dakani miksonganiara gitalgipa Covid sajinmani jatsa JN.1 ko ia bilsio World Health Organization-ni parakatani bidingo nipiltainiko dakangaha jeon ia gitalgipa Covid sabisina maming kenchakani dongja ine Lyndoh parakataha.
Ia gitalgipa sabisina manderang maming dakeba jajrengna nangjawa aro health departmentni Integrated Disease Surveillance Program nigita chotchanggija nirokanirangko dakangenga ine Lyngdoh u·iatangaha. Indake ong·genchimoba re∙baenggipa maniani salrango simsaksonagita mande bang·e rogipa kutturirango mask rangko ganchina, jakrangko jaksue rongtale rakkichina aro mande bang·e tom·anirangoni chel·e dongchinagita u·iatangaha. Unbaksana sabisirang jekai hypertension, diabetes, kidney disease saa gnanggiparang, be·en ding·anirangko aro sagoprangni chinrangko man·genchimode nambate simsaksochinagita health officialrang didiangaha.
