Re∙baenggipa bilsio Tura songjinmao chang 5 gipa Meghalaya Games ko sokachakani bidingo West Garo Hills ni DC Jagdish Chelani, DRDA conference hall-o tarisamsoaniko nipilange tom·bimonganiko dakangaha. Ia tom·anio DC dingtang dingtang department rangni tarisamsoaniko tale ra·angan baksa, kal·susaaniko name matchotatna man·a gita adita ku·pattianirangko aro mikkangchi dakna nanggni kamrangni bidingo agantalate on·angaha.
Ia chang bongagipa Meghalaya Games ko 2024 bilsini January 15 oni 20 tarikona ong·atangna Meghalaya sorkari tik ka·aha. Ian Garo Hills-o a·dokni dal·gipa kal·susaataniko skanggipa changna soka chakani ong·enga, jekon sal 6 na Tura songjinmao ong·atanggen. Ia kal·susaaniko sokachakna songjinmako rongtal an·talatna sorkarini gita pilak Development Committee, songsalo dilenggiparangko bakrimpana adita tangka paisarangko on·e dakchakangenga.
Ia susaanio bak ra·nasienggipa kal·susanagiparangko aro officialrangko dongchakatna wilwilao donggipa skul aro college rango tarisamsoenga ine u·ina man·aha. Meghalaya games 2024-o ming 22 susaatani bakrango sak hajal gittam mang kal·giparang bakko ra·anggen ine koborna parakataha.
