Re·baenggipa 2024 Lok Sabha pu·onanio Turani biapna susaanio da·o ong·enggipa MP Agatha K. Sangma ko chepilna ka·dongsoenga ine NPP State Working President aro Cabinet minister Marcuise Marak aganangaha.
Re·anggipa bilsini MLA pu·onaniko ni·atgenchimode NPP ge 24 biaponiko sak 18 MLA biaprango chena man·aha aro ge 3 ba 4 biaprango banggija vote-rangchisan sirikaha ine Marak aganangaha. Iarang pilakko nigrike 2024 bilsini MP pu·onao nam·e daken NPP chegipa ong·gen aro da·o dipet susana am·enggiparango darang party an bilakgipa dongjaenga, gipin partyrang da·onaba sana ticketko on·gen maming kobor dongkujaenga ine aganangaha.
Garo Hills on·a re·ange nigenchimode ma·mong sorkarini bang·a projectrang chu·soknagita man·aha aro Garo Hills ni manderang bang·a namgnirangko man·an baksana NPP sorkarini kamko namniktokenga. Ian NPP ni chegniko name dake mesoksoenga ine Marak aganangaha.
Tura ni MDC Bernard Marak ni ma·mong sorkarini bang·a projectrang chu·sokgija dongenga ine matnanganina aganengon, Marak badia project chu·sokgija dongenga ine sing·doan baksa chu·sokgijaniko sakki on·china didiangaha. Unbaksana maming sakkigri ia kattarangko aganjachina gita Marak mol·molangjolaha.
Congress ni Deborah Marak aro Saleng Sangma ko susaatna gita tik ka·soani gimin sing·on, Deborah Marak beben skango niksenggipa ong·genchimoba da·ode uni somoi batangaha aro da·oni somoirang namen dingtangaha ine Marak aganangaha.
