Meghalaya Early Childhood Development Mission ko ra·gatanio nangchongmotgipa dakna nanggni kamrangni bidingo chanchirimna gita Tura songjinmao mijal salni bako workshop ko ong·atangaha. Ia workshop ko Development Commissioner Sampath Kumar ni dakdilanio ADC rang, Project Director rang, Medical Health Officer aro Garo Hills ni dingtang dingtang department rang dongpae bakko ra·angaha.
Ia workshop o Meghalaya Early Childhood Development Mission ko namgipa gadango ra·gatna a·dokni dingtang dingtang department jekai Health, Social Welfare, Education aro Cummunity & Rural Development department rang apsan bakrime dakna nanggni kamrangni bidingo Kumar didia gnang aganangaha.
Ia mission ni skanggipa phase o bi·sarangko namroroatna sengnang nirokaniko dakan baksana ma·aparangni nangani aro neng·nikanirangko masie ra·aniko dakanggen. Bi·sarang bilsi 5 ong·aona kingking 90 percent-nigita gisikni chanchina sapgipa somoi ong·ani gimin uamangko nambate nirokna aro skinagita nanga ine Kumar agantalate on·angaha. Unbaksana chadamberangni bang·roroanichi sorkarini kamrang komirikrikengani a·sel, mikkangchi ia kam mangmangna nitena nangjanagita bi·sarangni poraimiting somoion uamangna gipin sapani cholrangkoba skie on·a nanga ineba aganangaha.
Ia mission-ni mongsongbatgipa dakna nanggni kamrang jekai sanna banniko man·ani, namgipa cha·a ringani, bida man·ani, ma·apani simsakani, nanggipa bosturangko su·ale on·ani bidingo jadokni gisepo ja·kurangko de·anggen ineba Kumar janapangaha.
