Mijal salni bakko Meghalayani Chief Secretary D P. Wahlang, Health and Social Welfare Departmentni Principal Secretary Sampath Kumar, PHE-ni Commissioner & Secretary Syed Md Razi aro Education departmentni Director Ambrose Marak baksa ma·mong sorkarini aro a∙dok sorkarini chamatgimin schemerangni bidingo a∙jani BDO rang aro pilak departmentni Officer-rang baksa nipiltaianiko dakna Baghmara Circuit Houseni gitalgipa Conference Hall o tom·e chanchirimangaha.
Ia tom·e nipiltaianio ma·mong aro a∙dok sorkarini chamatgimin scheme jekai PMAY, MGNREGA, JJM, NRLM, ICDS, Health, Education, PWD Roads, NH, NHIDCL, Banking aro dingtang dingtang schemerangni bidingo department tangtangnigita agantalate on∙aniko dakangaha aro chu∙onggijanirangko namdapatnagita tik ka∙angaha. Tom∙ani somoio kam ka∙anio chagrongenggipa neng·nikanirangko department tangtangnigita Chief Secretary-na agantalate on∙angan baksana Social Welfare Departmentni Principal Secretary Anganwadi Centre-rangko rika cho∙anio mongsonggipa ong∙e ra∙na nang∙enga ine aganangaha.
Garo Hills a∙jarangni L.P skulrango gital skigiparangko rimnapna kam ka·anio name chu∙sokanina an∙tangni ku∙si ong∙aniko parakangan baksana pilak L.P aro U.P skulrango Library ba ki∙taprangko jakkalna man∙agita ki∙tap donani kutturirangko kulichinagita Chief Secretary didiangaha. Unbaksana primary skulrango me·su samjakrangko ge∙nagita chatro chatrirangna skie on∙chinagitaba SDSEO rangko didiangaha. Una agreba SDO Health Engineering Wings o bangbang ong·e dongenggipa kamrangna ta·rake rimnapaniko dakchinaba didiangjolaha.
