Mijal salni bako Self Help Group (SHG) rangna Exhibition aro bosturangko pala simaniko dakna gita Baghmara ni Bakdil Training Centre o NABARD ni dakchakaniko man·e Bakdil ni ong·atenggipako Baghmara SBI ni Branch Manager Khogen Laishram oprake on·angaha.
Ia Exhibition ba pala simaniko dakaniara me·chikma dolni SHG rangko a·jao bilakbatatna aro uamangni bosturangko pala simanio dakchake uamangni janggitanganio chagrongenggipa obosta ba tangka paisani gita naljoke dongna gita dakchakani ong·a ine agane NABARD ni dakchakanina aro Bakdil NGO dolni indakgipa programko ong·atdilanina Laishram de·mittele aganangaha. Unbaksana gisiko nanggipa SHG dolrangna bank nigita loan rangko on·a ku·rachakangan baksana Prime Minister Modi ni Atmannirbhar Bharat Abhiyan nigita biaptango man·gipa dingtang dingtang bosturangna gisiko on·a agangimino pangchake aganangaha.
Ia program o NABARD ni District Development Manager Khelchandra Chongtham ba Exhibition o dongpae indakgipa programrangko ong·ataniara a·jao pale sime cha·giparangko salantio bre·e cha·enggipa manderang baksa uamangni nangnikaniko ma·sigrike nangrime rakkiani ong·a aro songadamona gipinchini re·bae bading chiwalgiparangko komiatna dakchakani ong·a. Uandake SHG dolrang namnamgipa bosturangko pale komia damrango pala simaniko dake salantio bree cha·enggipa manderangko bang·e man·agita amma aro an·tangtangna namgipa cholko dake ra·na nanga ine aganangaha.
Ia program o Bakdil ni Director Fr. Cyril Sangma, Bakdil o kam ka·giparang, Wagesik ni Nokma aro dingtang dingtang block rangoni SHG dolrang re·bae bako ra·angaha. Ia exhibition ko ong·atani somoi-o dingtang dingtang SHG ni tarigimin bosturang jekai bija bitchi, achar, an·tangtangni tarigipa chu, bite oniko jetgimin ringani, mesu samjak, jatni ganding chinding aro sola repani bosturangko mesokan baksa palanikoba dakangjolaha.
