December 14 tariko National Energy Conservation Award (NECA) ko ong·atani somoio, Meghalaya a∙dok gnigipa biapko man∙e State Energy Efficiency Performance Award ko man∙angaha. Ia award program ko ma∙mong sorkarioni Ministry of Power, Bureau of Energy Efficiency (BEE), Energy Conservation Act 2001 o pangchake ong·atangaha. NEC award ko New Delhi ni Vigyan Bhawan o India ni President Draupadi Murmu ni dongpaanio ong∙atangaha.
National Energy Conservation Award-ara bijoliko ripinganio nambatgipa ba a∙doko bijoli jakkalanio komibate jakkalna man∙gipa a∙dokrangna on∙gipa boksis ong∙a. Ia awardko 1991 bisionin a∙bachengate bilsiantian December 14 tariko bijoli ripinganio nambatgipa a·dokrangna ma∙mong sorkarinigita awardko on∙rongbaenga. Ia awardko ra∙chakani somoio, indakgipa award ko man∙anichi a∙doko bijoli jakkalanio buring bolgrimko nosto ka∙gija mikkangchina ripinganio chu∙sokaniko mesoka aro bimchipe kam ka·angkuna didianiko on∙a ine a∙dok sorkarini Power Minister A T Mondal aganangaha. Buring bolgrimko nosto ka·gija bijoliko jakkalna man·agita a·dok sorkari saloniko bijoli bikote jakkalna tangka gong 500 crore ko chamate a·bachengatengaha ineba ua agandapangaha.
Meghalaya a·dok chioniko bijoliko bikote jakkalanio pangchakanichi wilwilao donggipa buring bolgrimko nosto ong·atgija ripingna cholko man·enga. Una agreba mikkangchi saloniko bijoliko bikote jakkalna man·agita damgni biaprango jean Suchen aro Thamar o damprakon 20 MW rangko bikotna miksonganirangkoba janapangjolaha. Batanggimin bilsirangko niatgenchimode MePDCL ni bijoli watanio gimaanirangkoba namen ra·ona man·aha ine u·iatangaha.
Bilsi 2021-22 somoirango bijoli watanio gimaanirang 25% mang ong·aoni, 2022-23 bilsio 16% ona tang·onatna man·an baksa bijolina gamanirangkoba nambata ja·kurangko de·angenga ine parakataha. Unbaksana Meghalaya a·dokni indakgipa namgipa ja·ku de·ani gadango bimungko man·aniara mikkangchi chu·ongagita bijolirangko sokatna aro buring bolgrimko nisiatgija ripingna miksonganiko mesoka jeon mandena namgnikosan ra·baaigija a·dokni silroro namroroanina dangdike on·ani ong·anggen ine a·dok sorkari Power Department ni Commisioner aro Secretary Sanjay Goyal aganangaha.
