A∙doko dingtang dingtang neng∙nikanirangko nichange maming namgniko ra∙bagijagipa festivalrangko ong∙ate tangka paisarangko jakkalenga ine adita political dilgiparangni sorkarini kosako matnanganiko Tourism Minister Paul Lyngdoh jegalataha. Cherry Blossom ko batanggimin bilsi bongaonin ong·atbaenga aro ia festivalko ong∙atanichi adoko tourism ni a·bao tang∙dobaaniko nikna man·angaha ine Lyngdoh aganangaha. Cherry Blossom aro me∙gong festivalrangko ong∙atanichi gipin a∙song ba a∙dokrangoni songre songgabatgiparang aro biap nina re·bagiparang baridapaniko nikna man∙engaha. Una agreba ia festivalrangko ong∙atanichi Meghalaya a∙dokko outlook magazine-o mikkangchi tourist rangna nambatgipa biap ine biming mingatako man·aha ine Lyngdoh aganangaha.
Sorkario donggipa dingtang dingtang departmentrangna bilsi a·bachengaonin March jao a·dokni Assembly Budget Session o janape jinmani ra·chakanichi tangka paisarangko chamanaha. Festivalrangko ong·atna tourism departmentna chamgiming tangkarangkosa jakkalenga aro gipin departmentrangko namdapatna chamgimin tangkarangoniko ra·sroe jakkalenga ong·ja ine Lyngdoh agandapangaha. A∙doko rama jal∙angrang namjanina, skia poraiani gadango neng∙nikarangnirang donganina, chirangko chu∙ongagita man∙janina, tourism departmentnigita kam ka∙aniko dontongataiode namgni dongjawa aro a∙dokko namdapatna tangka man∙anirangko bariatna gimik departmentnigitan kamko ka·angna nanggen ineba Lyngdoh aganangaha.
