Adita salrangna skang Niti Aayog ni Multi-Dimensional Poverty Index o bilsi bongana a∙dokko namdapatna ka∙gimin kamrangko parakatanio Meghalaya a∙dok namjabatsranggipa rangoni damsa ong∙enga ine saksa Youth Congress activist Junebirth Marak janapataha. Meghalaya a·dokko namdapatna bilsi bongani gisepo kam ka·anio Bihar aro Jharkhand a∙dokrang baksa a∙dokko tang∙doatanio nambatgijagiparangoni ong∙engani gimin iani bidingo ta∙raken nirokaniko dakna nanga ine Marak a∙dok sorkariko didiataha.
Multi-Dimensional Poverty Index o namjabatgipa a∙dokoni damsa ine bimingko man∙aniara, adoko sanna bannanirang chu∙ongijani aro atchidaldal bi∙sarangni janggitanganirang komibe∙enga ine Marak janapangaha. Uandake a∙doko sanchakram biaprangko namdapatna, chu∙ongagita sannani bosturangko on∙china aro chu∙ongagita dangdike on·giparangko kamo rimnapchina Marak a∙dok sorkariko didiangaha. Rongtal an∙talani bidingoba nok te 100 oni te 17 mangnide rongtalgipa paikanarang dongja ineba parakataha. Unbaksana Garo aro Khasi Hills a·jarango bang∙bata nokdangrangan rongtal an∙talchakram biaprang dongjaengani gimin nirokatna nangenga ine Marak agandapangaha.
Apsandaken lekka porani bidingoba Niti Aayog ni parakatanio Meghalaya adok komibatgiparangoni damsa ine bimingko man·angaha. Sorkarini skulrango 40 percent na komibaten skigiparang dongja baksana skichakani blackboard aro skichakna kragipa kutturirang dongijani bang∙en dongenga ine janapataha. Una agreba songadam nokadamrango skulrangona re∙banagita namgipa rama jal∙angrang dongjani a·selo poraienggipa chatro chatrirangna neng∙nikaniko on∙enga ine Marak janapangaha.
Batanggimin 2018 bilsini pu·onani somoio wenanirango lekka pora ko namdapatna skanggipa ong∙e ra∙gen ine ku∙rachakgenchimoba maming namdapani aro tang∙dodapanirang dongja ine Marak aganangaha.
Poraienggipa chatro chatrirangna scholarship ni tangkarangko on∙gija donenganian mingsa ku∙rachakgiminko chu∙sokatgijaniko mesoka. Education Minister ni Advisor HM Shangpliang tangka gong 45 croreko scholarship na chamataha ine parakatmanahaoba da∙alona kingkingba tangka paisarangko chatro chatrirangna sokatkujaenga ine Marak aganangaha.
A∙dokko namdapatna aro sildapatrorona chadamberangni jakon ong∙ani gimin mikkangchi uamangni namgnina sorkarini ku∙rachakgiminrangko niate ta∙rake chu∙sokatchina Marak aro uni gipin dolrang a∙dok sorkariko didiataha.
