Atal Mission for Rejuvenation and Urban Transformation (AMRUT) 2.0 skanggipa phase ni ning∙o Williamnagar Urban Water Scheme nigita kam ka·anirangko mijal salni bako Williamnagar constituency ni MLA Marcuise N. Marak re∙ange nirokeaniko dakangaha. Ia kam ka∙enganiko nirokeanio, nambee kam ka∙anirangko nike chu∙ongnikani kattarangko Marak janape aganangaha.
Ia scheme na gong 121 crore-ko chamaha aro 2050 bilsiona kingking Williamnagar songjinmani ning∙o donggipa nokdangrangna chirangko chu∙ongagita sokatna miksonge tarianirangko dakangenga ine Marak aganangaha. Ia scheme ni ning∙o chirangko chimongchakramko tarina Kusimkolgre, Balsrigittim, Samgong, Terrace Gitim, DC New colony, PHE campus aro Dorengkigre biapko basee donaha. Ge 10 chi chimongchakramrangko tarienggipaoni, ge 4 biaponikode jakkalengaha jean ge 7992 nokdangrangna chirangko sokatnagita man∙engaha. Ia project ni kamrangko 75% nigita matchotatnagita man∙aha ine Marak janapangaha. Ia skanggipa phase ko matchotani ja∙mano dam bri Municipal ward rang project ni namgniko man∙anggen ine koborna parakataha.
Ru∙utgija somoini gisepon Williamnagar Urban Water Supply Scheme ni gnigipa phase ko kam ka∙nagita dakna nanggipa kamrangko niamgita ra∙chakmanahaode a∙bachengatnagita man∙anggen ine Marak aganangaha. Ia kamko matchotatnagita man∙genchimode Williamnagar Municipal jol gimiknan chu∙ongagita chirangko sokatna man∙gnok ine Marak parakangaha.
