Mega Ex Servicemen (ESM) rallyko Indian Army aro Rajya Sainik Board, Headquarters 101 Area dolrang, da·al salni bako Tura Dakopgre SMELC buildingo ong·atangaha. Ia tom·aniona Tura ni MP Agatha Sangma mongsonggipa ong·e sokbae bakko ra·e sipai dolrangni dangdike on·anina mittelpilaniko dakangaha.
Sipai ni a·bao dangdike on·giparang bang·a somoion dambemitingon kamoni neng·takna nanggiparang bang·beaniko nike, sorkarinigita CM Elevate aro Promotion and Incubation of Market Driven Enterprise (PRIME) scheme rango uamang an·tangtangni changa sapaniko jakkale janggitangnagita cholko on·enga ine Sangma janapangaha. Unbaksana a·dok sorkari a·doko Sainik School rangko a·bachengatnagita cholrangko sandiengani bidingoba aganangaha. Una agreba 58 Gorkha Training Centre aro Assam Regiment Centre rang Meghalaya a·doko gitcham dangdike on·gipa sipairangna pension on·anio neng·nikanirangko komiatna dakchakanikoba janapangaha.
Tura o ia rally ko ong·atani miksonganiara, Garo Hills o gitcham dangdike on·gipa sipairang kamoniko neng·takata man·genchimoba, uamangni nokdangrango neng·nikgipa chagronganirangko olgrokatna aro nambatatna jotton ka·ani ong·a ine Rajya Sainik Board Meghalaya ni Director Colonel Gautam Rai aganangaha. Ia apsan dakgipa rallyko Headquarters 101 Area Shillong Happy Valley oba November 24 tariko ong·atangaha ine janapangaha.
Ia rallyko ong·atanio bang·a gitcham dangdike on·gipa sipairang, dakgrik dinggrikanio bako ong·giparang, be·ennigita neng·nikaniko man·giparang aro dakgrikanio sigiparangni segrigipa jikgiparangna namgnirangko on·an baksana sipai dolni nokdangoni maming dakeba chel·ataniko man·jachina miksonge ong·atangaha ineba aganangaha.
