Mijal salni bako ma∙sina man∙gijagipa manderang, Rangsapara Secondary Skulni skigipa sakgnioniko tangka paisarangko sekdrae uamangko bilongbee doke sate donangani a·selo skigipa saksa janggi galaona sokaha aro sakgipin skigipa saknaaniko man·skaaha ine koborna parakataha. Sianggipa mandeara Tengton R. Sangma ong∙a ine ma∙sinagita man∙aha.
Pulis dolrangni agananigtade S Chetri aro Tengton Sangma Nongstoin songjinmaoni Rangsapara-ona bike o songrebaengmiting somoio ma∙sina man∙gijagipa manderang Mynniar songo uamangko champengsoe tangkarangko ra∙sekdraan baksana ka·saninggija doke sate donangaha. Saknaa man∙gipa manderangko Nongstoin Civil Hospitalona sanna bannaniko daknagita rimanggenchimoba, Sangma bilongbee saknaaniko man∙e janggiko galna nangaha ine u∙iatangaha. Dosi dakgipa manderangko pulis dolrangnigita am∙sandianiko dakangenga ineba parakataha.
