South Garo Hills Gasuapara Block ni ning·o donggipa Wagebokgre Govt. Lower Primary aro Secondary skulrangko A·chik Holistic Awakening Movement (AHAM) CEB HQ Tura ni General Secretary Clinton R. Marak aro AHAM Gasuapara Unit da·al salni bako nirokaniko dakangaha.
Nirokeani somoio LP skulo skigiparang donggija bilsi gittam ong·nasipile galchipe donaniko niknagita man·aha aro skichakram biaprangba chu·ongagita dongja ine AHAM dol u·iatangaha. Skigiparang dongjani a·selo poraienggipa bi·sarang skulko watna nangao ga·akenga ineba aganangaha. Indakgipa neng·nikanirangko cha·grongani a·selo songni bi·sarangna namgipa skie ra·aniko man·jaenga ine janapangaha.
Apsan daken Wagebokgre songni Secondary skul jean Rashtriya Madhyamik Shiksha Abhiyan (RMSA) scheme nigita rikenggipa skul building ko bilsi-4 ong·pilomangba matchotchipgija galchipe donenga ine niknagita man·angaha. Uamangni agananigitade apsan bilsirango RMSA skul building rikgiparang bang·bata songrangon matchotgenchimoba, Wagebokgre songni Secondary skul ko da·alona kingkingba rikmankujaenga ineba u·iatangaha. Skulni bi·sarang aro skigiparang skul nokrang dongjani a·sel community hall rangosa class rangko ra·nagita nangenga ine janapataha. Ian Administration ni kam ka·anio chu·sokgijaniko mesokani ong·a ine AHAM dolrang aganangaha.
Chatro chatrirangna namgipa skia poraianiko on·a aro uamang mikkangchi chu·sokna man·agita kamko daito ra·e ka·enggiparangko ta·rakkale nirokate nanggipa ja·kurangko de·chinagita didian baksana AHAM dolrang mol·molanikoba dakangaha.
