Tura o ong·atnasienggipa Meghalaya Games 2024 na name tarisamsonagita da·al salni bako WGH ni DC, Sports Department aro jako ra·e kamko ka·enggipa departmentrang baksa Chief Minister Conrad Sangma tom·aniko dakangaha.
Ia tom·bimonganio kal·susanagipa chadamberangna tarisamsoenggipa kal·chakram biap, dongchakani biap, cha·a ringani, re·a doani aro chirangko chu·onge on·anio maming neng·nikagri sokatna nirokaniko dakangaha.
Ia Meghalaya Games ko name dake chu·sokatnagita aro susanagipa chadamberangna mikkangchi nambata gadango kal·susana man·agita ka·dongsoani kattarangko CM janapangaha. Apsan daken iako ong·atanichi jatni daka rika aro tourism nigita Meghalaya a·dokni chadamberangko pekgipa bosturangoni naljokatna sports ni gita dingtang dake kamrangko ka·anggen ineba parakataha.
