West Garo Hills, Tura songjinmao Meghalaya Games 2024 ko sokachaknagita a∙jani Area Development Committee ni President, Secretary-rang, Municipal Board aro MeECL-rang baksa a∙jani DC Jagdish Chelani tom∙e chanchirimangaha. Ia tom∙anio songjinmani gittimrangko rongtalatna aro pekwatgipa ramarango nitobee tarisamsonagita chanchinrimangan baksana chamatgimin tangka paisarangni bidingoba talate on∙angaha.
Ia kamrangko ka∙anira Meghalaya Games 2024 o kal∙susana aro nina re∙baenggipa manderangko name rimchaksoaniko dakna aro jatni meli nangrimgrike donganiko mesokaniba ong∙gen ine DC aganangaha. Ia kal·susaaniko sokachakaniara susanasigiparangnasan ong∙aigija a∙jao songdongenggipa manderangna an∙tangni bimchipaniko mesoknagita chol ong∙enga aro a·jao pilak songdongenggiparangan ia kamko ka∙anio bakrimaniko on∙e apsan bimchipe kamko ka∙e Meghalaya Games 2024 ko name chu∙sokgipa ong∙atna ine DC ku∙monganiko on∙angjolaha.
