South Garo Hills a∙jani Nongalbibra Tourism Society, December jani 15 aro 16 tariko salgnina Zip Lining aro Rappelling trainingko Awemong Simsang Zero Point Nongalbibra o ong∙atna tik ka∙angaha. Ia trainingo bakko ra∙na gisiko nanggiparang gong 1200 tangkarangko game an∙tangtangni bimingrangko December 13, 2023 na skang segate ra∙china u∙iataniko dakangaha. Ia salgnina skie ra∙anio uamang dingtangmancha manderangna Nongalbibrani nitogipa a∙bri a∙kong biaprangko nina cholko on∙a miksonge ong∙atangenga ine parakataha.
Garo Hills o nikronggijagipa aro dakronggijagipa rokkomsa skie ra∙anio gisiko nanggiparang bakko ra∙epachina Nongalbibra Tourism Society ni Publicity Secretary, Peter Awe Sangma manderangna u∙iatangaha. Iani bidingo maiba talna nanganirang donggenchimode 9436544663 ba 9365227501 number-ona call ka∙ate sing∙atnagita man∙gen ine Sangma parakataha. Manderang an∙tangtangni bimingrangko segatmiting somoio Nongalbibra Tourism Society ni whatsapp gita watatgipa message ko skichakram a∙damona sokani ja∙mano mesokpilchina mol∙molanikoba u·iatangjolaha.
