Jengjal Baljek o gittamgipa Me·gong Festival 2023, jekon December 7 oni 9 tarikona ong·atnasienggipako name maniange matchotatna man·agita WGH ni DC Jagdish Chelani adita ge·etanirangko dakangaha.
Ia manianiko December 7 tariko attam 4:30 bajioni oprakaniko dake a·bachengatna tik ka·angaha. Ia manianiko ong·atenggiparang, dokan dakgiparang, Medical-ni manderang, pulis dol aro gipin bak donggiparangna agre salni 12 bajina skang ong·chakenggipa a·damo manderangko napna on·jachinagita ge·etaniko dakangaha. Ia ra·gatgimin niamrangko salgittamna jakkalanggen ine u·iatangaha.
Ia manianiona re·bagipa manderangko naljoke rakkinagita chu aro uandake pekgipa bosturangko palgipa dokanrangko walni 10 baji ja·mano dongtongchina aro gipin dokanrangko 12 bajio chipchina didianiko dakangaha. Apsandake pring 1 bajini somoini gisepon manichakram biaponi ong·kate noktangtangchi re·angchinagita ge·etanikoba on·angjolaha.
