Gittamgipa Farmer’s Parliament ko State Convention Centre o ong·atani somoio, bosturangko salruranagita rel gariko ra·baaniara a·dokni manderangna aro game cha·giparangna bilongen dakchakani ong·gen ine skotong Minister Conrad Sangma aganangaha. Iani bidingo a·dok sorkari ma·mong sorkari aro bako ong·giparang baksa golporimanirangko dakangkuenga maina adita neng·nikanirangko chagrongengani a·selo, rel gariko ra·banagita ja·ku de·na man·kujaenga ine kobor ra·timgiparangna parakangaha.
Bosturangko salruranagita rel gariko ra·bana neng·nikanirangko chagronganiko bonatna aro a·dok sorkari maming dakeba rel gariko ra·bana kam ka·aniko dontongna miksongani dongja ine Sangma aganangaha. Ia salko a·dokni game cha·giparangna ong·atengon game cha·giparangko dingtangmancha u·ie ra·na, didianiko on·a, dakchakaniko on·a, jakko on·pana aro bang·a programme rangko ong·ate, tangka paisarangko on·dape, dingtang dingtang skianirangko on·e, technology rangnigita dakchakaniko on·anian ong·a ine Sangma janapangaha. Indake ong·engon game cha·giparangna salsako game cha·giparangni sal ine gisik ra·e katchae manina nanga ineba Sangma agandapangaha.
Ia salko manianiara game cha·giparangni dingtang dingtang nanganirangko, neng·nikanirangko aro apsan daken mikkangchi maikai namdapatnagita man·ani bidingo chanchirimnagita chol ong·a ine Sangma aganangaha. Una agreba mikkangchi game cha·giparangna pale sim·e cha·ana sorkarinigita chanchisoanirangni bidingo sing·on, game cha·giparang an·tangtangan association ko a·bachenge niam retirangko tarie darang gipino pangchakgija chu·gimik bil gnange pala sim·anirangko dakna man·agita dingtang dingtang biaprango Farmer’s marketrangko rike on·aha ine Sangma aganangaha.
Ia chasongo game ge·e cha·giparangni bading chiwalani a·bao namen dingtangan baksana game cha·giparang baksa bakrime kam ka·anian bosturangko pala sim·anio nambatgipa a·dam ong·a ine Agriculture Minister Ampareen Lyngdoh ba aganangaha. Apsan daken game cha·giparangni bosturangko pala sim·anio department nigita nambata gadangona ra·dona dakchakanirangkoba on·enga ine ua agandapangaha.
