Tura, Chandmari Artificial Turf football kal·chakram o ong·atenggipa Tura Champions Trophy ni skanggipa semi-final kal·susaaniko da·al salni bako ong·atangaha. Ia skanggipa semi final o Selsella SA aro Maram FC ni gisepo kal·susaangaha.
Ia kal·susaanio Selsella SA goal 3 aro Maram FC goal 2 ko chipna man·angaha. Kal·susaanio Maram FC ni Thymmoibok Mukkim doltangna goal 2 ko chipangaha. Apsan daken chegipa doloni Chiranjit Rabha goal 2 aro Simprang M. Marak Selsella SA na goal 1 ko chipe on·e Maram FC ko amate final ona sokdogipa skanggipa dol ong·aha. Ia kal·susaanio Player of the match award ko Selsella SA ni Chiranjit Rabha man·angaha.
Tura Champions Trophy ni gnigipa semi final ko knalo kal·atangskagen jeon Druma Sandruma aro Greenwood Dagrenggre final ona soknagita susagrikaniko dakanggen.
