December jani 1 tariko, Akhil Bharatiya Vidyarthi Parishad (ABVP) Meghalaya Prant dingtang dingtang nanganirangko aro ja∙ku de∙anirangko chanchirimna executive tom∙aniko ong∙atangaha. ABVP ni dakna nanganirangara, 2023-24 bilsina a∙dokna dolni President, Secretary ko songna pu∙onaniko ong∙atna aro office-o kam ka∙nagiparangko seokna, SWC aro SEC ni memberrangko dolna seokaniko chanchirimna miksonge tom∙aniko ong∙atangaha. Jinmani ra∙chakanichi ABVP Meghalaya Prant changsatai Dr. Sashankutlang Khongthohrem ko a∙dokni President aro Tengku M. Marak-ko Secretary na seokangtaiaha.
Dr. Sashankutlang Khongthohrem, East Khasi Hills Pynursla songoni ong∙a jean Ri-War College, Pynursla ni padot ong∙enga, unbaksana Ashorphi Academy Hr. Secondary Schoolni Director-ba ong∙a. Ua ABVP o batanggimin 2009 bilsirangonin kim·kime kam ka∙bae da∙onaba dol baksa ong∙kuenga. Tengku M. Marak, West Garo Hills Dadenggre songoni ong∙skaa aro ua ABVP o 2018 bilsionin kam ka∙baenga ine koborna parakataha. Ua saksa poraigipa chatro ong∙e, da∙o BA.LLB ko Shillong Law College o poraienga ineba u∙iataha.
