Da∙al salni bako State Cancer Society of Meghalaya, Civil Hospital Tura aro NP-NCD, West Garo Hills baksa nangrime Tura Civil Hospital o Cancer sabisini bidingo mikrakatani aro tangka gri sannaniko ong∙atangaha. Ia health camp ona Shillongni doctor sakgittam chongmotan Shillong Civil Hospital ni HOD Dr. Anisha Mawlong, Cancer Wing Oncologist Dr. Farida Momin aro Dr. J.C. Lamin bakko ra∙angaha.
Unbaksana Tura Civil Hospitalni Joint Director cum Superintendent Dr. Inbert Ch. Marak, MCH Hospitalni Joint Director cum Superintendent Seimida K. Marak, Tura West Garo Hills ni Additional DM&HO Dr. Jakrimbel A. Sangma ba tom∙aniona re∙bae bakko ra∙angaha. Sannaniko dakna sokbagipa manderangna cancer sabisini a·bachengbaani bidingo mikrakataniko u·iatan baksana cancer sabisini chinrangkoba agantalate on∙angaha.
Gnigipa bako cancer sabisina porikka ra∙aniko hospital ni conference hall o bimingrangko segatani ja∙man dakangaha. Porikka ra∙anio Cancer sabisi gnang ine u·igiparangko Chemotherapy aro ramramgipa operation rangko dake sannaniko Tura Civil Hospitalon dakanggen. Una agreba Turao sanna man∙gijagiparangko Shillong ba gipin biaprangona Radiation Therapy ba dingtang dake sannanirangna watatskagen ine u∙iatangaha.
Tura Civil Hospitalni Joint Director cum Superintendent Dr. Inbert Ch. Marak kobor ra∙timgiparang baksa golpoengon, Meghalaya a∙doko ku·sikni aro gitokni cancer bang∙batgipa ong∙engani gimin manderang indakgipa indin sanne on∙ani camprangona re∙bae sannaniko dakanichi uamangna bilongen dakchakani ong∙anggen ine ua aganangaha.
