Mijal salni bako South West Khasi Hills Zone ni NGO, A∙chik Holistic Awakening Movement (AHAM) dolrang a∙jao nangchongmotgipa kamrangko nirokatchinagita Deputy Chief Minister Prestone Tynsong na memorandum-ko on∙angaha. Mingsa nanganiara, SWKH a∙jao Chibak oni Waikut ona re·gipa km 14 mang ong·gipa PWD rama, Khonjoy-Moheskola oni Majisora re·gipa km 10 ong·gipa, Rongdamggai-Moheskola oni Gilagora re·gipa km 8 ong·gipa aro Rongdamggai-Moheskola oni Koraibari ona re·gipa km 10 ong·gipa ramarangko batanggimin bilsi bongana batpile galchipe don∙enga ine janape AHAM SWKH Zone ni President Crownbetter T. Sangma u∙iatangaha.
Ia ramara namen namjabegipa aro gari gorarangko salna saltogijagipa rama ong∙e songdongenggipa manderangna namen neng·nikaniko on∙enga. Ia rama namjani a∙sel a∙jao maming tang·doanirang dongjaenga aro salantio jakkalenggipa bosturangko chu∙ongagita man·ja baksana sanna bannaniko dakanio neng·nikanirangko chagrongenga ine AHAM dolrang janapangaha. Ian a∙jani manderangni mongsonggipa re∙rurana jakkalenggipa rama ong∙a aro iako tarie on∙genchimode songdongenggiparangna bang·a namgniko on·an baksana a∙jani tang·doaniko niknagita ramako ta·rake tarie on·pachina janape mol·molangaha.
Unbaksana Khonjoy songni jolo maming niamrangko tarie ja·rikanirang dongjani a∙sel songdongenggipa manderangna jajrengani aro neng·nikanirangko man·engani gimin pulis thanako ra·bae on·chinaba AHAM dolrang janapangaha. Khonjoy aro uni sepanggipa songrango manderangni jelbra jelsruanirang batrorobaenganichi adita namgijagipa kamrangko ka·aniba batrorobaenga. Pulis thana ko uamangna ra·bae on·aniara namgijagipa kamrangko champenganisan ong·aigija, songdongenggipa manderangna maming jajrengani gri naljokaniko on·aniba ong·gen ine uamang janapataha.
Una agreba Khonjoy songo pulis thana donggenchimode pulisrangni dongimin niamrango pangchake songsal baksa bakrime manderangko naljoke rakkinagita cholko man·anggen ine aganangaha. Indakgipa kamrangko dangdike on·anichi sorkarini a·dokni manderangko naljoke rakkina ku·mitchetaniko chu·sokatna ja·ku de·ani ong·gen ine AHAM dolrang janapangaha.
