North Garo Hills a·jani Dainadubi Circle Youth Organization (DCYO) dolrang Dainadubi jolni palo, adita dingtang dingtang nangarangni bidingo a·jani Deputy Commissioner ko changsatai gronge ta·rakale kamrangko nirokatpachina memorandum ko on·angaha.
Uamangni on·gimin memorandum o janapanigitade , salantio manderangni jakkalenggipa Damra-Mendipathar PWD ramao Assamko nape re·gipa Damas oni Nalbari ona namgija dongenggipa ramako taridape on·chinagita mol·molangaha. Unbaksana Dainadubi o chalaigija galchipe doneggipa Govt. Fruit Preservation Factory ko nirokate chalu ong·ataichina mol·molangaha. Ia factory ko a·bachengaoni ru·uta bilsirangna namen chalaigenchimoba biterangko bree kam ka·na chu·ongagita tangka paisarangko chamata dongjani a·selo kamrangko dontongatna nangao ga·akaha ine DCYO dolrang janapangaha.
Una agreba Dainadubi wilwilao chalaienggipa bang·a mobile network rang jekai Airtel, JIO, BSNL networkrangko watani tik ong·gijanina aro bijoli sia baksa network rang gimaanganinaba nirokatpachina mol·molangaha.
Ia janapgimin neng·nikanirangko niroke ta·rake kam ka·e on·pagenchimode Dainadubi wilwilao donggipa manderangni adita neng·nikanirangko olgrokatnagita amgen ine DCYO dolrang jolni palo janape mol·molangaha ine Ku·rongdik na parakataha.
