Meghalaya sorkarini officialrang da·al salo North East Petroleum Mazdoor Union (NEPMU) baksa Nongpoh o tom·e golporimani ja·mano a·dokona torangko jekai petrol aro diesel rangko sokatgija jingjengatna miksonganiko ra·galpilangaha ine koborko man·soaha. Tom·aniko Food & Civil Supplies department ni Commissioner aro Secretary Praveen Bakshi ni dil·anichi NEPMU dolrang baksa tom·tome songgigrikaniona ra·bana man·angaha.
Tom·ani ja·mano Bakshi koborna parakatengon, a·dokona torangko sokatanio maming neng·nikaniko chagrongna nangjawaha ine aganangaha. Unbaksana, to sokatna salenggipa garirangko NH 6 ramarango ong·gija dake kal·akaniko aro cha·ue ra·seke ra·ani mamlarangko am·sandie nirokaniko dakna a·dok sorkari ku·chakangaha ine parakangaha.
