Mijal salni bako Turani MP Agatha K. Sangma South Garo Hills a·jao District Development Co-ordination & Monitoring Committee (DISHA) ni tom∙bimonganiko Baghmara ni gitalgipa Circuit House Conference Hall o Mamong Sorkarini schemerangko niroknagita ong·atangaha. Ia tom∙aniko ong∙atanichi daitoko ra·e kamko ka·enggiparangko mikkangchi namdapatna aro nanggnirangko kam ka·angna didianiko on·anggen ine Sangma aganangaha.
Ia somoini bakko a·jani dingtang dingtang department rangni skotong ong·e dilgiparangko ia tom·anio nanggipa chanchirimanirangko chu·sokataninaba Sangma mittelpilaniko on∙angaha. Ia chanchirimanio a∙jao kam ka∙aniko dingtangatna aro namdapatna nanganirangko an·tangni bil ama dipet chu∙sokatna see rakkianiko dakangaha ine ua agandapangaha.
A·jani Deputy Commissioner Sivansh Awasthi uni rimchaksoani kattarangko agananio, MP Agatha Sangma ni DISHA tom·aniko ong·atanina mittelpilangan baksa scheme aro project rango adita neng·nikanirangko chagronganio, ia tom·aniko ong·atanichi a·jao manderangna nambate dangdike on·a dakchakani chol ong·anggen ine janape aganangaha.
