Sixth Schedule o ja∙rikna nanggipa niamrangko aro a∙doko donggipa jat gittamni dakbewal rikbewal aro aganbewalrangko skulo poraienggipa bi∙sarangna dingtang dakgipa skie on∙aniko dakangna a∙dok sorkari ja∙ku de∙angenga ine Education Minister Rakkam Sangma aganangaha. A∙doko ka∙na nanggnigiparangko chanchimanani ja∙mano badia bakko elementary, primary aro secondary ni gadango poraina nanggen uko bak dake on∙anggen. Mamong sorkarinigita Sixth Schedule ni bidingo skie on∙anirangko senggija a∙doko songdongenggipa poraienggipa chatro chatrirangna Sixth Schedule ni ja∙pangko u∙iatna nangchongmotaniko nike ja∙ku de∙enga ine Rakkam Sangma aganangaha.
Iako dakna chanchianiara ru∙utgija somoirangna skang Meghalaya Board of School Education (MBOSE) o National Council of Educational Research and Training (NCERT) ki∙taprangko class I oni X ona mikkang bilsioni ra∙gatna tik ka∙gipani bak ong∙a ineba ua agandapangaha. Ru∙utgija sal somoirangni gisepon iani bidingo Khasi Authors’ Society (KAS) aro A∙chik Literature Society (ALS) baksa golpogrikanikoba dakanggen ine Sangma aganangaha. Unbsaksana 8th Schedule-o Khasi aro A·chikkuko ra∙napna nangchongmotanikoba janape aganangaha. Una agreba Khasi aro A·chik ku·sikko mongsonggipa ong∙e jakkalna ra∙gatna miksonganio Khasi ku∙sikko agangipa jatrang A∙chik ku·sikko aro A∙chik jatrang Khasi ku∙sikko skie ra∙na nanggen ineba ua janapangaha.
