A∙chik Holistic Awakening Movement (AHAM) Northern Zone dolrang a∙jao dingtang dingtang nangnikanirangko janape Chief Minister Conrad Sangma ko gronge da∙al salni bako memorandum ko on·angaha.
AHAM dolni memorandum o janapanigitade a·jao nambata sanna bannaniko dakna man∙agita Mendipathar aro Dainadubi Primary Health Centre ko ta·raken Community Health Centre (CHC) ona tang·doatchina mol·molangaha. A·jao nanggipa rika choanirang jekai Library dongchapgipa Auditorium, Mendipathar o modern stadium, Wildlife office rangko rike on·china aro Mendipathar Govt. College o Science aro Commerce streamko a∙bachengate on∙chinagitaba janapangaha.
Unbaksana Bajengdoba aro Kharkutta jolo wa·al kamani somoirango nok jamrangko aro mandeni janggiko naljokatna man·agita nangchongmotgipa Fire Services branch office ko rike on∙china, chi jrosusaanirango gisik nanggipa chadamberangna dakchakaniko on·a swimming pool ko rike on∙china, Mendipathar o donggipa Meghalaya Handloom training centreko tang·doatna aro a∙jao Nursing institute ko a∙bachengate on∙china mol∙molangaha. Una agreba Mendipathar, Bajengdoba, Kharkutta, Mendal, Dainadubi, Adokgre bajar wilwilao donggipa biaprango street light rangko songe on∙chinaba dabiangaha.
