Mijal salni bako North East National Cadet Corps ni dilanio Meghalaya 41 BN NCC aro NCC Group Headquarter Shillong bakrime, NCC ni bilsi 75 gapaniko West Garo Hills a·jani Don Bosco College, Tura-o maniangaha. Ia manianiona West Garo Hills ni Deputy Commissioner Jagdish Chelani mongsonggipa sokgipa ong·e bakko ra·angaha. Unbaksana Northeast NCC ni ADG Major General Gagandeep ba tom·aniona sokbae bakko ra·angaha.
Ia manianiona sokbagipa pilak mongsonggipa manderangko Meghalaya 41 BN NCC ni cadet chatro chatrirang an·saobee aro kusi ong·e chrokmesae rimchaksoaniko dakangaha. NCC dolni bilsi 75 gapaniko maniangengon Northeast-ni ge 277 skulrang, 151 collegerang aro Northeast ni dam 6 a·dokrangoni ge 44 a·jarangni ku·mong nangrimaniko mesoke bakko ra·angenga.
NCC ni chatro chatrirang gipinrangna bate dingtanga maina NCC o bakrimahaon gipinrangba bate rakbate kam ka·na aro nama bewalo janggitangna ku·mikchetaha. A·songni dilgiparang ong·na NCC ni niam, daka rikani aro skianirangko ja·rike an∙tangtangko mikkangchi dilgiparang ong·na tarisonagita man·gen ine NCC ni ADG Major General aganangaha.
Apsan daken NCC rally aro Tura-ni NCC cadetrangni gimin aganangengon Garo Hillsna Tura-o NCC battalion gital chong·motan Meghalaya 41 NCC battalion ko man·anina kusi ong·aniko parake uni office koba Tura o songahani a·sel Garo Hillsni college o dongenggipa chatro chatri rangna bilongen dakchakbeaniko on·aha ine Don Bosco College, Tura-ni Principal Fr. Bivan R. Mukhim aganangaha.
Bang·a NCC ni tom·bimonganirang Shillong ba gipin biaprangosan ong·aigija da·ode Turaon ong·engaha. Tura o tom·bimonganirangko dakanichi chatro chatrirang altubee indakgipa tom·anirango bakko ra·e an·tangtangna changa sapanirangko skie ra·nagita cholko man·enga ua agandapangaha.
Bilsi 75 ong·aniko manianigita NCC dol Northeastern Region Car Rally koba ong·atangenga jekon batanggimin November jani 6 tariko Shillong-ni Soso Tham Auditorium-o, Meghalaya-ni skotong Minister Conrad K. Sangma a·bachengate on·angaha. Ia car rally-ko ong·ataniara, gamchatgipa aro orto gnanggipa ong·a maina ian chadamberangna, gipin a·dokni manderang baksa gronggrikna chol ong·a. Ian a·song gimikko apsan meli nangrimani aro saksa sakgipinko ma·sichakgrike mande ra·grikaniko mesokani ong·a ine Conrad K. Sangma oprakani salo aganangaha.
NCC ni Northeastern Region Car Rally-ko ong·atenggipa garirang da·al salo Don Bosco College, Tura-ona 4 baji mango sokbaaha. Ia rally ni garirang da·al pringni 8 baji mango Don Bosco College Tura-oni re·chakatange Williamnagar ko napake Guwahati songjinmaona re·anggen jeon Assam ni Chief Minister Himanta Biswa Sharma ni jakchi ia ong·enggipa car rally ko matchotatgen ine koborna parakataha.
