Tura songjinmani saksa Social Activist Cherian Momin, NEHU ni pilak dakna nanggni kamrangko janapate Chief Minister Conrad Sangma-ko nirokatpachina mol·molate chitti sedoataha. Skanggipao, NEHU o kamrangna rimnapaniko dakengon India sorkarini dongimin Reservation Policy ko jakkalchina Momin didiangaha. Iako ja·rikgenchimode Schedule Tribe, Schedule Caste aro gipin chonchongipa jatrangba kamrangko ka∙na apsan cholko man·a amgen ine ua aganangaha.
NEHU o ru·utgija somoirangna skang kam nakatgiparangko name talate u·iatjani gimin ra·galpile, gital daktaie campus ge∙gniona sokataichina Momin didiangaha. Kamrangna nakatgipa gadangrangni bidingo name rongtale manderangna u·iatgijanichi kamna gisiko nanggiparangko neng·nikaona sokata ineba parakangaha. Tura NEHU campus ko nichange chu·ongagita nirokjaengani gimin apsan nirokaniko on·china Momin chittio janapataha.
Nangchongmotgipa somoirango rang·gitik dakna nanggipa ostrorang, sanchakram nokrang, Pharmacists aro Lab technician ko kamo rakkina man·gijanian sanna bannani gadangko ra·ona aro naljokani grigipa ong·ata ine ua aganangaha. Unbaksana Horticulture aro Forestry Department ko ra·bana ja·manchakanichi University ni chu·gimik tang·doaniko ra·onaona sokata ine Momin agandapangaha. University o bilsi 15 ba 20 ona kam ka·giparangko watbrangataigija pangkame kamo rakkichinaba Momin mol·molangaha. Uamangni dangdike on·achisa University silroro namrorona a·bachenga aro uamangko mande ra·na nanga ine Momin aganangaha.
