East Garo Hills a·jao niam gri bol rate chimonge donenganiko, Pentom Momin ni nokoniko AHAM East Zone Williamnagar aro Forest Department bakrime am·sandianiko dake rim·na man·aha ine koborna parakataha. Ia kamko dolgnini bakrimanichi Momin ni donggipa Reserve Gittim Nengsila songoniko re·ange am·sandie November 22 tarikni wal 10:30 bajimango man·aha ine parakataha.
Ia niamgri chimonge donenggipa bolrangko pilak dakna nanggipa kamrangko ka·e porikka ra·angenga aro tal·bate u·ibatna sing·sandianiko dakangenga. Dosi dakgipa mandeko dongimin niamrango pangchake uni kosako raka sastiko on·anggen ineba parakataha.
