SWGH Ampatio District Sports Office ni kal·atgipa gittamgipa Women’s Football Tournament aro skanggipa Inter Mahari Football Tournament 2023 ko mijal salni bako bon·kame kal·ate an·saobee matchotangaha. Gittamgipa Women’s Football Tournament o Krimkro FC baksa Sisters United bil·tinggrike kal·susaanio goal prakko man·e bon·kamao penalty tingsusaanio Krimkro FC goal gittamko man∙e chegipa ong·angaha. Ia kal·anio Krimkro FC ni Dodime Domanchi M. Sangma bang·bate goal chipgipani bimingko man·angaha aro Nokame M. Marak nambatgipa goal keeper ni bimingko man·angaha.
Sisters United dolni Brichina Sangma nambate kal·gipani bimingko man·angskaaha. Unbaksana skanggipa changna Inter Mahari Football Tournament o Agitok Mahari FC baksa Ruga Mahari FC ni gisepgriko susaanio, Agitok Mahari 3-2 goalchi chegipa ong·angskaaha. Agitok Mahari FC dolni Johnfield A. Sangma nambate kal·gipani bimingko man·angaha aro Rangsa Mahari FC ni Elnath R. Marak bang·bate goal chipgipani bimingko man·angskaaha. Ruga Mahari FC ni Tengson R. Marak nambatgipa goalkeeper ni bimingko man·angaha aro Domba Mahari FC dolrangna niamrangko nambate ja·rike kal·anina mande ra·e boksisko on·angskaaha.
Bon·kamgipa robol kal·susaanio Mahendragangj ni MLA Sanjay A. Sangma mongsonggipa sokgipa ong·e Inter mahari kal·susaaniara dingtang dingtang mahari rang baksa chadamberang u·i ma·sigrikna aro bakrimna mingsa chol ong·e gamchataniko aganangaha. Una agreba Garo Hills ni chadamberangni dingtang dingtang kal·susaanirango bang·a changa sapanirangkoba Sangma janape aganangjolaha.
