Meghalaya a·dokni kal∙susaani a·bao gisiko nanggiparang ru·utgija somoini gisepon 2032 bilsini Olympics o India a·songni palo kal·nagita seokako man·a ka·dongsoe STAR programko ra·gataha ine Chief Minister Conrad Sangma parakataha. Ia programnigita kal·susaanio changgipa sapgiparangko MSOA aro Sports department nigita seokaniko skanggipa changna dakenga ine u·iatangaha.
Seokaniko daknagita Australia a·songni Edge10 company ko rimnapaha ineba janapangaha. Ia seokaniko dakanichi kal·susagipa chadamberangni changa sapani aro uamangni be·enigita bilakaniko ma·sie ra·aniko nigrike se·gatna dakchakaniko on·enga. 2022 bilsio skanggipa phase o sak 4541 bi·sarangko porikka ra·anio kal·na sapgipa sak 200 chadamberangko seokangenba uamangna antiprako app ni gita aro jagittam prako dingtang dingtang training rangko on·angenga. Apsan daken gnigipa phase o sak 10,000 kal·susagiparangko porikka ra·angaha. Kal·na sapgipa chadamberangko nirokchinagitaba a·ja antion Coach rangko seoke uamangna skie on·a aro nirok simsakna daitoko on·angaha.
Ia seokanio sak 11 kal·susana sapgiparangko uamangni kal·na changao pangchake super eliter program jean a·dokoniko mikkangchi International gadango a·songni palo kal·nagita ka·dongsoe seokangaha. Super elite programna sak 11 seoka man·giparangko Sports departmentnigita nirok simsakaniko dake uamangni skie ra·ani, dongchakani aro cha·a ringani rangko Shillong songjinmao MSOA nirokatenga. Mikkangchi uamangni kal·na sapani aro chu·sokanio pangchake uamangko Northeast, National aro India a·songna kal·susanagita seokanikoba dakanggen ine u·iatangaha.
