Tura Motorsport Club (TMSC) dolrang, Bilgaro 4-wheel Challenge 2023 ko snigipa changna West Garo Hills a∙jao TMSC ni President aro Jengjal ni MDC Grahambell A. Sangma ni jakchi da∙aloni a∙bachengate on∙angaha. Ia susaaniko minggni bak dakate chongmotan car aro SUV garirangko dingtangate susaatanganiko dakatanggen.
Da∙al salni bako a·bri ramarangko re·ani aro ta∙rake salna namnikgiparangna Rongkhon Aldara Cafe oni re∙chakate Anogre ona salatanggen. November 18 tariko, apsandaken Aldara Cafe onin re∙chakate Aguragreni km 6 mang a·bri ramarango saldoataniko dakatskana miksongangenga.
Bakgni suale susaataniona bak ra∙nagiparang sak 27 mang sokbatokaha jeon Meghalaya a∙doknisan ong∙aigija Nagaland, Assam aro Northeast ni gipin bakrangoniba sokbatokaha. Bak ra·giparangko uamangni changa sapanio, mangrake baikamanio aro gari gorarango pangchake tosusaaniko dakanggen.
