Meghalaya Cricket Association (MCA), BCCI ni ong∙atenggipa Vijay Hazare Trophy-o kal∙nagita sak 15 me·asa dolrangna kal·nasigiparangko seokangaha. Ia kal·susaanio Meghalaya dolna Mumbai ni Tanmay Mishra ko a·dokni palo kal·nagita seokanikoba dakangaha jean Indian Premiere League (IPL) ni Royal Challengers Bangalore aro Deccan Chargers dolrangna kal·e on·anggipa ong·a. Mishra saksa Kenya a·songo dal·bagipa ong·e International cricket o kal·bagipaba ong·a ineba parakataha. Unbaksana kal·na sapgipa Rajesh Bishnoi aro Nakul Verma koba Meghalaya dolona rimnapaniko dakangaha ine u·iatangaha.
Ia kal∙susaanio Meghalaya a·dok changsni kal·susaaniko November 23 oni December 5 tarikona Jaipur o kal·anggen jeon Vidarbha, Chhattisgarh, Jharkhand, Maharashtra, Services, Manipur aro Hyderabad dolrang baksa apsan group o donataniko man·e uamang baksa susaaniko dakangna nanggen. Meghalaya dolrang Jaipur ona kal·susanagita November ni 20 tariko re·chakatanggen ine parakataha. Ia kal∙susaaniko Meghalaya a·dok dol sni baksa kal·anirangko dakanggen jekon November 23 tariko Vidarbha, 25 tariko Chhattisgarh, 27 tariko Jharkhand, 29 tariko Maharashtra, December 1 tariko Services, 3 tariko Manipur aro 5 tariko Hyderabad baksa kal·susaanggen.
Meghalaya dolna kal·na seokako man·giparang Akash Kumar Choudhary, Anish Charak, Bamanbha Shangpliang, Dippu Ch Sangma, Jaskirat Singh Sachdeva, Kishan Lyngdoh, Lerry G Sangma, Lakhan Singh, Md Nafees Siddique, Raj Biswa, Sanvert Kurkalang, Swarajeet Das, Nakul Verma, Rajesh Bishnoi aro Tanmay Mishra ko seokangaha. Neng·takate donchengenggipa Yogesh Tiwari, Wilco Marak, Robert Sangma, Arbin Singh aro Rounak Nongrum ong·a.
Kal∙giparangko dilna ba dakchaknagita Goutam Shome (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer) aro OL Warjri (Manager) ko seokangaha ine parakataha.
