Da∙al salni bako cabinet tom∙e chanchirimanio adita dingtangatani aro dakna nanggni kamrangko sorkari ra∙chakangaha. Skanggipao, Class 1 oni 10 ona NCERT ni ki∙taprangko adita namdapata gnang MBOSE ni syllabus o ra∙gatna miksonganiko ra∙chakangaha. Gitalgipa syllabus rangko skanggipa changna re·baenggipa bilsioni a∙bachengatna manchiangaha. Education department ko nirokenggipa dingtang dingtang dolrang baksa am·sandie aro sing∙sandie niani ja·mano MBOSE ni syllabus o Maths, Science aro English subject rango a∙song gimiko poraini gadangranggita ong·manjaengani gimin namdapatna nanganirangko nike NCERT ni syllabusko ja∙rikna chanchiangaha.
Gnigipao, a∙dok sorkari bangbanggipa biaprango skigipani kamrangna rimnapaniko ta·rake dakna man∙agita Meghalaya Education Recruitment Board (MERB) ko songnagita ra·chakangaha. Batanggimin bilsi 3 ba 4 na gapatkugija donenggipa Secondary aro Higher Secondary skulrango ge 187 mang donggipa biaprango skigiparangko rimnapaniko ja gittam ba ja dokni gisepo matchotatna tik ka∙angaha. Ia dongimin board chi dingtang dingtang skulni skigipani kamrangna rimnapna seokanikoba dakanggen.
Labour Department ko Department of Labour, Employment & Skill ine mingjitna ra∙chakangaha. Meghalaya Fiscal Responsibility & Budget Management Act, 2006 ko adita dingtangatangna cabinet ra·chakangaha. Ia Act ko re·anggipa bilsioba ma·mong sorkarini raiko man·e a·dok sorkarini tangka ra·chaksoaniko baridapatna tarigimin niamrango pangchake dingtangatangaha. Re·anggipa bilsio bang·a departmentrangni niamrangko dingtange tarigimino pangchake tangka ra·chaksoaniko 4 percent mangna bariatna sorkari man·angaha.
