Meghalaya Tourism-nigita West Garo Hills ni Aminda Rangsa o Zip Lining ko tarie on·gipako da·al salni bako Tura-ni MP Agatha K. Sangma Aminda Rangsa Eco Tourism Co-operative Society na pakwate on·angaha. Ia Zip Lining ko uamang jako ra·e pilak dakna nangnirangko ja·rike kamko ka·angskagen. Ian Garo Hills o skanggipa Zip Lining ong·a baksa bang·a songrebagiparangko ia biapona re·baaniko niknagita kadongsoenga aro ian Tourism department ni jotton ka·e kam ka·anichi chu·soknagita man·aha ine Sangma aganangaha.
Apsan daken North Garo Hills-oba Paragliding aro Nongalbibra o River Rafting koba biapko nina songregiparangko sokbaatnagita a·bachengataha ineba Sangma aganangaha. Sangmani agananigitade, ia kamrangara a·doko tourism ni a·bako tangdo·atnagita an·chingni skotong Minister Conrad K. Sangmani dingtangmancha gisiko nange kam ka·ani ong·a. Iarangko dakanichi an·chingni a·dokni kajinarangko bariatnagita man·an baksa a·dokni bading chiwale cha·gipa manderangni janggitanganiko tangdo·atna gita ja·ku de·ani ong·a.
Ian Garo Hills a·jani manderangna katchabeani ong·a aro jolni manderang songrebagiparangna dongchakram biaprangko tarie cholrangko dakchinagita WGH ni ADC Tangchiring K. Sangma didianiko on·angaha. Ia Zip Liningko chalainagita batanggimin June jao Aminda Rangsani sak 8 manderangko anti gittam na East Khasi Hills a·jani Mawkdok Zip Lining o skie ra·na District Tourism Department nigita watataha ine District Tourism Officer Ava Sherin Sangma aganangaha. Ia kamko a·bachengatna Ministry of Tourism nigita gong Lakh 75 tangkarangko chamataha ineba ua janapanagaha. Aminda Rangsa Eco Tourism Co-operation Society ni member Jengman Sangma ni agananigitade ua aro uni ka·rimska sak 7 baksa Mawkdok o skie ra·bae ia Zip Lining ko November jani 18 tarikoni 10 oni 4 bajiona a·bachengatanggen ine parakangaha.
Ia program o Gambegre ni BDO Raj Kumar Hajong, WGH Tourism ni Assistant Director, Bulbuly S. Marak, Aminda Rangsa ni Nokma, Aminda Rangsa Baptist Gilja ni Pamong Wanson Sangma, Eco Tourism Society ni member rang aro jolni manderang dongpae bakko ra·angaha.
