South Garo Hills Baghmara-oni, Assam Guwahati aro Bangladesh-ona rel gariko re∙chakatatna chanchianiko ra∙chakchina Border Area Development ni Minister Rakkam A. Sangma sorkariko didiangaha. Rel gariko Baghmara-ona ra∙bana Captain Williamson Sangma ni chasongonin chanchia dongaha aro ia apsankon Sangma dabiangkuaigen ine mijal salo aganangaha. Baghmara-ko napake Dhaka songjinmaona re∙na man∙genchimode Meghalayana aro Northeast-ni gipin a∙dokrangna janggi tangani gadangko, bading chiwalani aro kajina man∙aniko tang·doatna dakchakanggen ine Sangma agandapangaha.
Iani bidingo Sangma ru∙utgijan Chief Minister Conrad Sangma baksa golpoaniko dakanggen ineba parakangaha. Uni agananigitade pilak songre songgabatgipa aro bading chiwalgipa manderang napbana man∙agita check gate-ko songe on∙a dabianiko dakmanaha jeon rel gari re∙bagenchimode manderangna kajina man∙aniko adita tang∙doatgen ine Sangma aganangaha. Shillong aro Byrnihat-ona rel gari ra∙baaniko Baghmara-ona ra∙baskana chanchiani dongama ine sing∙aniko dakon, chol man∙genchimode railways department, ma∙mong sorkari aro a∙dok sorkariko mol∙mole nianggen ine Sangma agandapangaha.
Niam gri napsrukbagiparangko champengsona man∙agita Meghalaya Land Transfer Act aro Sixth Schedule ko constitution o ra∙bae on∙anian dal∙batgipa silchidare ong∙gen ine Sangma aganangaha. Pilak songdongenggipa manderangko rel gari ra∙baani bidingo nama aro namgijaniko nigrike chanchie ja∙ku de∙china ua didiangaha.
