South Garo Hills a∙jao skanggipa changna river rafting ba chio ring chosusaataniko Simsang Chibimao ong∙ate namen chu∙soke matchotatna man∙angaha. Ia susaaniona dingtang dingtang biaponi gisiko nanggipa sak 14 mang manderang re∙bae bak ra∙aniko nikangna man∙aha. Ring chosusaataniko Nongalbibra A∙wemong Zero Point-oni a∙bachengate Kanchrusrik Wariona kilometre 18 mang ong∙e chel∙gipa chi ramarangko choate matchotataha.
Ia river rafting susaaniko Ja∙ripbomchi Adventure Tour, A∙wemong Zero Point, Me∙mang Koksi Adventurous Festival, South Garo Hills District Administration, North East Adventure aro Rural Tourism baksa nangrime ong∙atangaha. Iandakgipa sports ni bakko skanggipa changna ong∙atgenchimoba bang∙a a∙jani dolrang aro department official rangni bakrime chanchirimanichi chu∙sokatna man∙aha.
