BCCI me·chik dolni bilsi 15 ni ning·o ong·atgipa One Day Trophy na kal·susana Meghalaya Cricket Association (MCA) nigita sak 15 kal·susanasigiparang Kolkata ona knal salni bako re·chakatangnasienga. Meghalaya dolrang chu·gimik chang bongana Assam, Jammu and Kashmir, Nagaland, Delhi aro Karnataka baksa West Bengal a·doko kal·susaanggen.
Gipin a·dokrang baksa susaaniko daknagita Guwahati o November 3 tarikoni tarisamsoaniko dakange mijal salni bako dontongate, kal·susanasienggiparang aro officialrang da·al salni bako Kolkata ona re·chakataniko dakanggen ine u·iataniko dakangaha.
Meghalaya a·dokna sak 11 mongsonggipa kal·nasienggiparangara Anastesia Shullai, Anjana Kumari, Awesaina S. Marak, Carieyoka Lyngdoh, Dejianna M. Sangma, Diya Biswa, Habandarisha Shangpliang, Jennyfer Fancon, Joannah Pyngrope, Lini Mandakini Ksoo, Mania Sangma, Mendy Adrena Mawlong, Ronjoli Basumatary, Steffenie Sohshang aro Zoya Tasneem ong·a. Unbaksana janapgimin bimungrangni bodolo nangan somoio bodol sak gittam kal·nagita seokako man·giparangni bimungrangara Evanrihun Sohshang, Bijimme Ch. Momin aro Lawanjanai Synnah ong·a.
Meghalaya dolko skigiparangara Head Coach Rupashree Sharma, Asst. Coach Bhakupar Mylliemngap, Trainer Sweetie Marboh, Physio Jakrimbal D. Arengh aro Manager Pynhunlang Kharnarbi ong·e dilaniko dakangenga.
Meghalaya dolrang November ni 17 tariko Assam baksa, 19 tariko Jammu and Kashmir baksa, 21 tariko Nagaland baksa, 23 tariko Delhi baksa aro 25 tariko Karnataka baksa kal·susaaniko dakanggen.
