Meghalaya a∙doko ASHA kam ka∙giparang uamangni man∙gnirangko bariatna dabianiko sorkarini knachakjaenganina, November 7 tarikoni dondikgija jingjengatenganiko Health & Family Welfare Departmentni Joint Secretary T G. Momin uamangko dontongatchina Sombar salo mol·molangaha.
Sanna-bannaniko dangdike on∙anio uamangni gamchataniko u∙ie department nigita uamangni dabianirangko nirokenga aro a∙dok sorkari baksa agangrikanirangko dakenga ine Momin aganangaha. Songsalni namgnina dangdike on·anio neng∙nikaniko on∙janagita ASHA dolrangni jingjengataniko dontongatchinaba ua mol·molangaha. A∙dok sorkari sanna bannani a∙bako namdapatna miksonge re∙mikkangani donga jekon dangdike on∙enggiparangni namgnina aro uamangni nangnikaniko chu∙sokatna sorkari kam ka∙enga ine ua agandapangaha.
Batanggimin bilsirangoba ASHA kam ka∙giparangni nangnikanirangna dabianiko sorkari knachake kam ka∙ange uamangni japrako man∙gni dormaharangko maming neng∙nika gri sokatna “ASHA First” application ko a∙bachengate on∙anian mingsa chu∙sokani ong∙a. Ia application ko October 2022 bilsio a∙bachengate on∙anichi je ASHA rangan bimchipe an∙tangtangko on∙kange kam ka∙giparang tangka gong hajal sni ba hajal chet dake japrako man∙agita dakchakangaha ine Momin aganangaha. Una agreba ia application gita batanggimin ja 12 ni gisepo tangka gong 21 crore ko aro ja 18 ni man∙gnina gong core 34 mangko chamataha ine ua aganangaha.
Unbaksana batanggimin 2013 bilsioni Meghalaya Maternity Benefit Scheme (MMBS) aro Meghalaya ASHA Benefit Scheme (MABS) o man·a nanggni donggipa tangka gong 53 crore koba 2021-22 bilsio on∙aniba mingsa chusokani ong∙a. ASHA kam ka∙giparangna da∙alo sorkari gong hajal 2 ko japrako on∙enga ine ua aganangaha. Sanna-bannaniko namdapatna ja∙ku de∙anio songantiona re·e tikka su∙anirango songsalna dangdikanio neng∙nikanirang ong∙janagita VHC dilgiparangkoba dakchaknagita sorkari ge∙etaniko on∙angaha.
