November 11 tarik Sonibar salo, All Garo Hills ASHA Workers’ Union dolrang adita chanchirimanirangko dakna chang 7 gipa tom·aniko Tikrikilla songo ong·atangaha. Ia tom·anio ASHA dolrang Health Minister Ampareen Lyngdoh ni uamangko Medical Department ni mande ong·ja ine agangipa kattarangko jegale aro salantio man·gnigipa tangkarangko bariatna dabie kamtangtangona re·anggija, dontonggija jingjengatangna tik ka·angaha. Uamangni dabienggiparangna Tura songjinmao re∙jomaniko ong·atna miksongahaoba, re·ruraenggipa garirangna neng·nikaniko ra·bajanagita dontonggija jingjengatangna ja·ku de·angskaaha ine ASHA dolni General Secretary Nokatchi Ch. Marak parakataha.
ASHA kam ka·giparangni dabienggipani bidingo Meghalaya ASHA Workers’ Union ni President M. June Myrsing pilak songni nokmarangko uamangna chakpaaniko on·pachina dingtangmancha chittio see mol·molanikoba dakangaha. Unbaksana ASHA rangni dingtangdingtang neng·nikanirangko mikkango done dakchakaniko on·pachina Health Minister na chittiko sedoataha. Daily Wages Act o pangchake dingtangatna nanganirangko dakchina, MHIS aro gipin schemerangni ning·o sanna bannani namgniko uamangna ra·bae on·an baksana ASHA rangko kamoni maming ja·pang gri ra·galaniko champengatna niam retiko tarichina mol·mole chittio janapataha.
