Meghalaya aro Bangladesh a·songni sima ari jolo chel·chakenggipa BSF sipairang baksa West Garo Hills-ni pulis dolrang bakrime am∙sandianiko dake badingsrukna miksonge donenggipa ge 270 chini bostarangko Paulpara songoniko mijal salo man·aha. Adita ka·dongna man·gipa kobor rangko man·enba a·damona re·angon kg 13,500 mang chinirangko man·aha jean lakh 5 hajal 40 damni ong·a ine koborna parakataha.
U·iatanigitade ia chinirangko galchipgimin nok ge∙saoniko Bangladesh a∙songona badingsrukna miksonge ra∙angna tarie donaniko rim∙a man∙aha ine pulis dolrang parakataha. Rim∙a man∙gipa chinirangko niamo pangchake kamrangko ka·na sepangbatgipa pulis thanaona ra·ange doneaha. BSF sipairang aro pulis dolrangni bakrime sima ari jolo badingsrukani kamrangko jringna nirokanian aro chu·sokgipa ong·ani uamangni pangkime champengsona kam ka·aniko mesoka.
