Re∙baenggipa bilsini January 15 oni 20 tarikona ong∙atnasienggipa chang 5 gipa Meghalaya Games 2023 ko Turao sokachakanggen ine Chief Minister Conrad Sangma parakataha. Battangimin 2022 bilsio chang 4 gipa Meghalaya Games ko, Meghalaya a·dokni bilsi 50 gapaniko maniani bako Shillong songjinmao ong∙atangaha.
Meghalaya Gamesko 2001 bilsio ming sku mangmang dingtang dingtang kal∙anirangchi abachengataha. 2004 bilsio ming 12 kal∙susaanirangona tang∙doate susaanirangko dakangskaaha aro 2020 bilsio a∙dok sorkari kal∙susaanirango namdapatna nangchongmotanirangko nike baridapatna mangsonge ming 16 kal∙susaanirangona tang∙doatna man∙angaha.
Da∙alo chu∙gimik ming 19 dingtang dingtang kal∙susaanirango bak ragiparangna baridapataha. Tura jilao 2024 Meghalaya Gamesko mamingba neng∙nika gri sokachakna gita dingtang dingtang kal∙chakani bakrangko tarisamsoanirangko niksona gita man∙enga.
