Selsella jolni bakrimgimin NGO rang jekai ASWA, FKJGP, GSMC, GSU, Mothers’ Union aro ADE dolrang sorkari office o kam ka·giparangni somoigita sokjaani gimin West Garo Hills a·jani DC Jagdish Chelanina lekka sedoe niatpachina mol·molangaha.
Uamangni chittio see parakatanigitade Selsella jolo sorkari kamko ka·enggiparang officeona donsogimin somoirango sokjaengani a·sel songsalni manderangna neng·nikaniko ra·baenga ine janapangaha. NGO dolrangni janapatgimin adita niatna nanggipa office-rangara C&RD Block, CHC Hospital, C.D Veterinary Dispensary Office, ICDS Office, Selsella Distribution Sub-division Office aro SBI Branch ia officerango kam ka·giparang mongsongbate somoigita sokjaenga ine parakataha.
Ia ong·enggipa obostarangko niate Selsella songo aro wilwilao donggipa sorkarini officerango kam ka·giparangko pringni 10 bajionin office-ona sokani somoiko tik ka·pachina NGO dolrang mol·molataha. Officeona somoigita sokanichi songsalni kamrangko nengrae ka·na man·a aro manderangna dakchakaniko on·a ine NGO dolrang agane sorkari kam ka·giparangni somoiko jakkalaniko dingtangatpachina didiangaha.
