South Garo Hills a·jani Capt. Williamson Memorial Government College Baghmara ni a∙bachengani bilsi 32 gapaniko da∙al salni bako maniangaha. Ia salko manianiona Education Minister Rakkam A. Sangma aro Education department ni Advisor H.M Shangpliang mongsonggipa ong∙e bakko ra∙angaha.
Education Minister Rakkam Sangma, Capt. Williamson Memorial Government College ko Baghmaraona ra∙bana rake kam ka∙dilgiparang, ua somoio a∙jani MLA ong·gipa Lotsing Sangma aro gipin dilgiparangko gisik ra·e a∙jao lekka pora bidako ra·bana kam ka∙anina mittelpile aganangaha. Una agreba ia College ko a∙bachengdilgipa Principal aro skie on∙giparangkoba uamangni songsalni namgnina dangdike on·anio on·kange kam ka∙anina demittele aganangaha.
Unbaksana collegeo kam ka∙enggipa sakantikon college ni namroroanina kam ka·anio chu∙sokgipa ong∙na bimchipe kam ka∙angkuna didianikoba on∙angjolaha.
College ko namdapatna rika cho∙ani kamrangko a·bachengna aro bangbang gapatna nangenggipa kamrangko ra·bae on·a unbaksana nangchongmotgipa dakchakanirangko a∙dok sorkari nirokanggen ineba ua janapangaha. Una agreba ia Collegeo mikkang bilsi dipet Science aro Commerce Stream ko a∙bachengatna sorkari kam ka∙enga ine ua agandapangaha.
A∙dok sorkarini gita skul aro college o skigipani kamrango rimnapanio seokna MPSC o napatgija dingtang Board ko done seokangna manchianirangkoba dakangenga ine ua janapangaha.
