Ku·mandi Kotok dolrang uamangni gnigipa changna jinma tom·bimonge chanchirimaniko gelna man·telgijagipa a·selrangni gimin don·tongatna nangao sokaha ine koborna parakataha. Dontongatna nangani adita a·selrangara MCS porikka, Catholic Mondoli Tura Diocese bilsi 50 gapaniko maniani, skul aro college rang porikka ong∙tokengani gimin ia ja∙kuko de∙aha ine parakataha. Skul, college rango bang∙bata dilgiparang aro ja∙rikgiparang dongani a∙selo iarang pilakko nigrike Ku∙mandi Kotok dolrang gnigipa tom∙aniko dontongataha.
Dilgiparang chanchirime dolni gnigipa tom∙aniko re·baengipa November 25 tarik salona manchie donangskaaha. Ia donsogimin salna maibakai jakegijagipa sal ong·taiode Executive Committee chanchie jinmana parakataigen ine Ku∙mandi Kotokni Secretary Arcosh M. Momin u∙iataha. Una agreba uamangni ia gnigipa tom∙bimonganio jatni dakarika, sea jota aro ku∙tangko ripingna mangsonganio pilak bida pakwatramrangni skigiparang, chatro chatrirang, ma∙gipa pagiparang, pangchamgipa dilgiparang, gisiko nanggiparangko re∙bae bakko ra∙epachina mol∙molataha.
