Batanggimin salo Ministry of Home Affairs ni Eighth Schedule ni bak ong·atna parakatgipa ming 38 ku·sikrango A·chikkuko napatjani gimin Garo Hills ni adita dilgiparang ma·mongni Home Secretary aro official rang baksa Delhi o golporimaniko dakangaha.
Eighth Schedule o ra·napna janapgimin ming 38 ku·sikrango Khasi ku·sikko napatahaoba A·chikkuko galchangangaha aro maming aganchakanirang dongkujaengani a·sel da·alo dilgiparang ia ja·kuko de·angaha.
Home Secretary ko grongnagita MP Agatha Sangma re·dilanga jeon unbaksa gipin dilgiparang jekai Speaker Thomas Sangma, Cabinet Minister Marcuise Marak, A·chik Literature Society (ALS) ni President Dr. Caroline R. Marak aro ALS ni gipin manderangba re·angpaaha. Ia golporimanio A·chik ku·sikko Eighth Schedule o ra·napna dilgiparang dingtang mancha Home Secretary ko mol·molangaha.
